Летапіс гімназі
18 верасня 1804 года на прапанову князя Адама Чартарыйскага імператар Аляксандар І выдае рэскрыпт аб адкрыцці ў Свіслачы Гродзенскай губернскай гімназіі. Гімназія ўтрымлівалася на сродкі ўладальніка Свіслачы графа Вінцэнта Тышкевіча.
15 лістапада 1805 года гімназія была адкрыта афіцыйна як акадэмічная школа, падначаленая Віленскаму ўніверсітэту, мела 7 класаў, у першы год займалася 46 гімназістаў.Першым дырэктарам гімназіі быў прызначаны Гіяцынт (Яцэк) Крусінскі – доктар філасофіі, член варшаўскага таварыства аматараў навук.
23 лістапада 1835 года гімназія стала павятовай пасля польскага паўстання 1830-1831 года.
1 верасня 1851 года гімназія была пераведзена ў мястэчка Шаўлі Віленскай губерні, у Свіслачы засталася толькі прагімназія або пяцікласнае дваранскае вучылішча.
1865 год – за актыўны ўдзел студэнтаў у паўстанні 1863-1864 гадоў закрылі і прагімназію, засталося толькі двухкласнае вучылішча.
26 вернасня 1876 года – у Свіслачы адкрылася сярэдняя навучальная ўстанова, на гэты раз – руская настаўніцкая семінарыя.
Жнівень 1915 – эвакуацыя семінарыі ў горад Мядынь Калужскай вобласці (набліжаўся германскі фронт) , дзе праіснавала да 1921 года.
З 1916 па 1918 год па дазволу нямецкіх улад працавала беларуская настаўніцкая семінарыя.
З 1919 па 1922 год дзейнічала пачатковая школа, а з 1 студзеня 1922 года адкрыта настаўніцкая прэпанда, якая з 20 студзеня 1924 года ператворана ў настаўніцкую семінарыю імя Рамуальда Траўгута.
1 верасня 1935 года – настаўніцкая семінарыя ператворана ў гімназію імя Рамуальда Траўгута.
1 верасня 1939 года – адкрыта беларуская гімназія, якая дзейнічала да самага пачатку Вялікай Айчыннай вайны.
1944 год – адразу пасля вызвалення ад нямецка-фашысцкіх захопнікаў, былі адноўлены заняткі Свіслацкай сярэдняй школы ў старым будынку былой гімназіі.
1963 год – пабудаваны новы будынак сярэдняй школы (цяпер тут размяшчаецца гімназія).
1987 год – сярэдняй школе №1 пастановай Міністэрства Асветы БССР прысвоена імя Кастуся Каліноўскага.
1 чэрвеня 2005 года пастановай Свіслацкага райвыканкама СШ №1 рэарганізавана ў ДУА “Гімназія №1 імя Кастуся Каліноўскага г.Свіслачы”

Славутыя выпускнікі Гродзенскай губернскай гімназіі
Кастусь Каліноўскі (1838-1864)
Нарадзіўся ў вёсцы Мастаўляны Гродзенскага павета (цяпер Беламтоцкае ваеводства). Выпускнік Свіслацкай гімназіі 1855 года. Кіраўнік паўстання 1863 – 1864 гадоў на Беларусі, у Польшчы і Літве, паэт, публіцыст.



Юзаф Ігнацы Крашэўскі (1812-1887)
Скончыў Свіслацкую гімназію ў 1829 годзе. Польскі пісьменнік, гісторык, мастак, грамадскі дзеяч. Бацька польскага гістарычнага рамана.


Осіп Міхайлавіч Кавалеўскі (1812-1878)
Вучыўся ў Свіслацкай гімназіі з 1809 па 1817 год. Заснаваў манголазнаўства ў Расіі. Загадчык кафедры ўсходніх моў у Казанскім універсітэце. Паплечнік Лабачэўскага.


Рамуальд Траўгут (1826-1864)
Скончыў гімназію ў 1842 годзе. Удзельнік Крымскай вайны 1853 – 1856 гадоў. Адзін з кіраўнікоў паўстання 1863 – 1864 гадоў. Павешаны ў Варшаве.


Напалеон Орда (1807-1883)
Выпускнік Свіслацкай гімназіі 1823 года. Кампазітар, піяніст, педагог, мастак, палітычны дзеяч.


Віктар Гельтман (1796-1874)
Скончыў Свіслацкую гімназію ў 1817 годзе. Разам з братам Іосіфам стварыў першае ў Беларусі ў 1819 годзе тайнае “Таварыства аматараў навук”, стварыў партыю “Дэмакратычнае таварыства”, аб якім гаворыцца ў “Маніфесце Камуністычнай партыіі”. З’яўляўся кіраўніком Кракаўскага паўстання.


Плакід Гаўрылавіч Янкоўскі (1810-1872)
Выпускнік Свіслацкай гімназіі. Вядомы польскі пісьменнік, перакладчык, святар.




Гімназія сёння
Гэта адукацыйная ўстанова, якая забяспечвае пераход да новай якасці адукацыі ў інтарэсах устойлівага развіцця праз фарміранне адказнасці за агульную справу, развіццё матэвацыі дасягнення поспеху ў кожнага суб’екта адукацыйнага працэсу па павышэнню якаці адукацыі.
У гімназіі працуе калектыў высокапрафесійных педагогаў. 82 % настаўнікаў маюць вышэйшую і першую катэгорыю. Лукша А.І., Семяняка І.Я. з’яўляюцца лаўрэатамі спецыяльнага фонду Прэзідэнта Рэспублікі Беларусь па сацыяльнай падтрымцы адораных вучняў і студэнтаў. Сініца А.А. – пераможца міжнароднага фестывалю даследчых і творчых работ “Учебный проект 2011”.
Прыярытэтныя напрамкі дзейнасці:

стварэнне здароўезберагаючай прасторы як фактара забеспячэння аховы і умацавання здароўя удзельнікаў вучэбна-выхаваўчага працэсу;

выхаванне падрастаючага пакалення ў кантэксце дзяржаўнай ідэалогіі, культурных традыцый краіны, на аснове ідэй, каштоўнасцей, якія адлюстроўваюць сутнасць беларускай дзяржаўнасці;

фарміраванне ключавых кампетэнцый вучня на аснове выкарыстання сучасных педагагічных тэхналогій;

эфектыўнае ўкараненне сучасных інфармацыйных тэхналогій для паспяховага інтэлектуальнага і творчага развіцця асобы вучня і настаўніка;

ажыццяўленне сістэмнага маніторынгу эфектыўнасці работы ўстановы адукацыі па забеспячэнню якасці адукацыі.

Наш гонар
Музей гісторыі школы быў адчынены ў 1987 годзе і адноўлены напярэдадні 200 –годдзя Гродзенскай губернскай гімназіі ў 2005 годзе. Ён з’яўляецца цэнтрам выхавання грамадзянскасці і патрыятызму гімназістаў.
Вядучая ідэя працы музея гісторыі:
Прывіццё нацыянальнай самасвядомасці і грамадзянскай пазіцыі ў рамках беларускай дзяржаўнасці праз захаванне і ўвасабленне гістарычных традыцый і культуры сваіх продкаў, выхаванне высокамаральнай асобы, адказнай за свой лёс і лёс Айчыны.
Сістэма абавязковых узаемазвязаных формаў арганізацыі краязнаўчай работы:
урокі з выкарыстаннем вучэбнага і краязнаўчага матэрыялу па прадметах;
факультатыўныя заняткі;
праграмныя і непраграмныя экскурсіі;
турысцкія паходы;
шматдзённыя вандроўкі і экспедыціі;
турысцка – краязнаўчыя вечарыны, віктарыны, спаборніцтвы;
навуковыя канферэнцыі;
Змест работы школьнага музея:
вывучэнне літаратурна – гістарычных крыніц, якія адпавядаюць профілю музея;
сістэматычнае папаўненне фондаў музея шляхам актыўнага пошуку звесткаў, дакументаў у турысцкіх паходах, вандроўках, экспедыцыях;
забеспячэнне захаванасці музейных прадметаў;
стварэнне і аднаўленне экспазіцый, стацыянарныя і рухомыя выставы;
правядзенне экскурсійнна - лектарскай работы для вучняў і насельніцтва;
садзеянне ў выкарыстанні экспазіцыі і фондаў музея ў вучэбна – выхаваўчым працэсе;
Напрамкі работы музея гісторыі школы:
удзел ва ўдасканаленні вучэбна – выхаваўчай работы ў гімназіі;
ахова і прапаганда помнікаў гісторыі , культуры і прыроды роднага краю;
культурна – асветніцкая дзейнасць сярод вучняў, бацькоўскай грамадскасці, насельніцтва горада;
навукова – даследчая і пошукавая дзейнасць сярод вучняў і настаўнікаў гімназіі.
Музейная экспазіцыя складаецца з наступных раздзелаў:
Гродзенская губернская гімназія 1805-1864;
Грамадска – палітычны рух у гімназіі;
Руская настаўніцкая семінарыя 1876 – 1915;
Польская настаўніцкая семінарыя 1924 – 1935;
Барацьба за беларускую школу;
Жыцццё і дзейнасць К,Каліноўскага;
Паўстанне 1863 -1864 гадоў на Свіслаччыне;
Свіслацкая сярэдняя школа 1944 – 1987;
Свіслацкая сярэдняя школа №1 імя К.Каліноўскага 1987 – 005;
Гімназія №1 імя К.Каліноўскага.

Спадзеёмся на супрацоўніцтва! Шчыра запрашаем!